Korban Centeng Ane Ngadu ke Komnas HAM

Cucuku... 

Mbah kagak tau kalo ternyate sepeninggal eMbah ada cucu dan cicit suka nakal ame tetangge. Liat entu si AW, BM, TH, IN, MT... ke-lime-nye sekarang mesti nginep di penjare gara2 ngegaplokin Ustad Uci ampe mukenye kayak melon, tembem abis, gigi-giginye juge dicopotin pake tang, matenye bengkak ampir copot eh copot, copot! mangkenye, kelimenya kena perkare sebab sale gawe, kena deh pasal 333 ato 170 KUHP. Rasain! Jangan pade nngikutin mereke, ye.

Gara-gara entu lah sekarang lain ceritenya, dengerin ye ane mau cerite seperti nyang Mbah bace di internet siang tadi.

Ustadz Uci alias Nur Yusuf (38), nyang disekap penjage bekas tempat ane pernah tinggal, lantaran dituding nyolong kotak amal di bekas makam ane,Mbah Priok, tadi ngedateingin kantor Komnas HAM pake ngesot, eh naek kursi rode ditemenin ame kuase hukumnye. Si Ustad Uci menta Komnas HAM ngebentuk tim pencari fakte (TPF) untuk buke semue soal kasusnye. Wah, kalo beneran dibuke, kalian cucu-cicit ane bise berabe, soalnye keberadaan ane yang cume cerite, dongeng, bakal diusik juge. ntar kalo ane, juge eloe pade, kehilangan ini tempat kite punye, masa' ane tinggal di dunia maye, mending kalo ame lune maye, ini dunie maye, blog.

oh ye cucu-cicit ane, tadi entu Ustad Uci, dateng ke Komnas HAM pake peci putih kayak mau berangkat haji sambil ngeliatin bibirnye yang sekarang monyong gara2 ditonjokin centeng2 nyang jagain tempet ane dulu dirawat setelah kecelakaan perahu nyang nimpe ane.

Kuase hukumnye, si Pance Nainggolan, ngomong ame wartawan, katenye gini nih, lihat, dengerin ane ngikutin gaye si Pance, "kami datang ke Komnas HAM untuk meminta perlindungan atas klien kami terutama terhadap kasus kekerasan yang menimpa dia. Untuk kasusnya sendiri memang sudah dilimpahkan kepada pihak kepolisian, dan kami harap serta kami yakin bahwa pihak kepolisian mampu mengusut secara tuntas," gitu katenye.

Pance juge nambahin kate-katenye, kalo pihaknye ngedesek Komnas HAM supaye stop saban aksi kekerasan dalam bentuk ape pun di sekitar areal makam ane, Mbah Priok. Nah lho. Sekarang kalian pade ati-ati ye, kalian lagi disorot ame medie masse.

Segini aje deh catetan ane malem ini.

ttd,

Mbah Priok